ആണും കരച്ചിലും

ആദ്യം
അമ്മിഞ്ഞക്ക് കരഞ്ഞപ്പോ
അമ്മ പറഞ്ഞു
ആണല്ലേ നീ കരയല്ലെന്ന്

പിന്നെ
ഉരുണ്ട് വീണ് പൊട്ടിയപ്പോ
അച്ഛന്‍ പറഞ്ഞു
ആണല്ലേ നീ കരയല്ലെന്ന്

വീണ്ടും
കളികൂടി വഴക്കിട്ടപ്പോ
ക്ലാസിലെ ടീച്ചര്‍ പറഞ്ഞു
ആണല്ലേ നീ കരയല്ലെന്ന്

പിന്നൊരുനാള്‍
ഇഷ്ടപ്പെട്ടവള്‍ ചതിച്ചുപോയപ്പോള്‍
കൂട്ടുകാര്‍ പറഞ്ഞു
ആണല്ലേ നീ കരയല്ലേന്ന്

ഒടുക്കം
ചുറ്റും നിന്നവര്‍ കരയുമ്പോള്‍
അവനവനോട് തന്നെ പറഞ്ഞു
ആണല്ലേ നീ ഇനിയെന്തിനു കരയണം