സ്വപ്നവും ജീവിതവും

ഒരു സ്വപ്നമുണ്ട്
ഏതോ ലോകത്ത്, എനിക്കറിയാത്ത
എന്നെയറിയാത്ത ആരുടേയൊക്കേയോ
ഇടയില്‍ അവരറിയാതെ അദൃശ്യനായി
അരൂപിയായി വെറുതേ നടക്കുമ്പോള്‍
മുന്നില്‍ കണ്ടു മറയുന്ന ജീവിതങ്ങള്‍ക്കിടയില്‍
എന്നെ തന്നെ, അല്ലെങ്കിലെന്നെപ്പോലെ
തന്നെ ഒരു ജീവനേയും പരിവാരങ്ങളേയും
പിന്നവന്റെ കിനാവുകളേയും കണ്ടിടുന്നതായ്,
അവനെന്റെ പ്രണയവും, ദുഖവും ചിരികളും
എന്റെ സ്വപ്നങ്ങളും രൂപവും എന്തിനെന്റെ
സങ്കല്പങ്ങള്‍ പോലുമുണ്ടെന്നും കണ്ടുപോം
അവന്റെ ഇന്നലെകളോടൊപ്പം നാളെകളും
കണ്ട് ഒപ്പം ഒട്ടിനടന്ന് വിസ്മയിക്കവേ
അറിയാതുണര്‍ന്നു പോയ്  സ്വപ്നത്തിനപ്പുറം
ആ നാളെകള്‍ ഇനിയെന്റേതുമാവുമോ എന്ന
ചോദ്യമാ സ്വപ്നത്തിനൊപ്പമവശേഷിക്കുന്നു